A 102-year-old Woman Was Polled At The House Of Sundarban Society Of Bhadkodra Village

Aarti Machhi, Bharuch: ગુજરાત વિધાનસભાની ચૂંટણીને હવે ગણતરીના દિવસો બાકી રહ્યા છે. ત્યારે તંત્ર દ્વારા વયોવૃધ્ધ મતદારો માટે વિશેષ વ્યવસ્થા ઊભી કરવામાં આવી છે. વિધાનસભાની સામાન્ય ચૂંટણીમાં મતદારોમાં પણ મતદાન કરવાનો ખાસ ઉત્સાહ જોવા મળી રહ્યો છે. ભરૂચ જિલ્લામાં એક તરફ યુવા પેઢી લોકશાહીના આ પર્વને મનાવવા માટે થનગની રહી છે. તો બીજી તરફ શતાયુ મતદારો વૃદ્ધાવસ્થામાં પણ પોતાના પવિત્ર મતાધિકારનો ઉપયોગ કરવા માટે એટલા જ ઉત્સુક છે.

ગુજરાત વિધાનસભા ચૂંટણીમાં 100 કરતા પણ વધુ આયુષ્ય ધરાવતા મતદારો મતદાન કરી શકે તે માટે ચૂંટણીપંચ દ્વારા ખાસ તૈયારીઓ કરવામાં છે. મતદાનના દિવસે મતદાન મથકે નહિ જઈ શકનાર લોકો માટે ભરૂચ જિલ્લા વહીવટી તંત્ર દ્વારા તેમની યાદી તૈયાર કરીને તેમના નિવાસસ્થાને જઈને મતદાન કરાવવાનું અયોજન કર્યું છે.

બૂથ લેવલ ઓફિસર દ્વારા અંકલેશ્વર તાલુકાના ભડકોદ્રા ગામની સુંદરવન સોસાયટી ખાતે રહેતા 102 વર્ષના વૃદ્ધ મહિલાએ મતદાન કર્યું હતુ. આ જે તે વિસ્તારના બ્લોક ઓફિસર દ્વારા મોટી ઉંમર ધરાવતા લોકો માટે મતદાન બેલેટ દ્વારા કરવાની કામગીરી હાથ ધરાઈ રહી છે. જેને લઇ ભડકોદ્રા ગામની સુંદરવન સોસાયટી ખાતે 102 વર્ષના કલાવતી પાલના ઘરે પંચની એક ટુકડી પહોંચી હતી અને પોસ્ટલ બેલેટ થકી તેઓના મત અધિકારનો ઉપયોગ કરાવવામાં આવ્યો હતો.

મહિલાએ પણ પોતાનો મત આપીને મતાધિકારનો ઉપયોગ કરી આનંદની લાગણી વ્યક્ત કરી હતી.જ્યારે અન્ય એક વયોવૃદ્ધ પુરુષે પણ મતદાન કર્યું હતુ. બંનેય વયોવૃદ્ધઓએ મતદાન કરીને આવનારી 1 ડિસેમ્બરની ચૂંટણીમાં મોટી સંખ્યામાં મતદાન કરે તેવી અપીલ પણ કરી હતી. મહિલાએ જણાવ્યું હતું કે મતદાન એ આપણો અધિકાર છે. દરેક વયના લોકો મતદાન માટે આગળ આવે તે માટે આગ્રહ કરવામાં આવ્યો હતો. તો અન્ય વિસ્તારમાંથી વધારે ઉંમર ધરાવતા લોકો આગળ આવી મતદાન કરે તે અત્યંત જરૂરી છે.